У Бабруйскую цэнтральную бальніцу з колата-рэзанай ранай грудной клеткі са сваёй кватэры брыгадай хуткай дапамогі быў дастаўлены і шпіталізаваны 35-гадовы мясцовы жыхар. Як высветлілася, нажавое раненне яму нанёс уласны бацька — паведамляе УУС Магілёўскага аблвыканкама
61-гадовы бабруйчанін пражываў у адной кватэры разам з жонкай і сынам. Аднак сям’я жыла, як чужыя людзі, па той прычыне, што бацька-пенсіянер злоўжываў алкагольнымі напоямі.
Напярэдадні трагедыі бацька і сын моцна пасварыліся. І калі, здавалася, што страсці ўжо ўлягліся, нецвярозы бацька падышоў да сына з нажом і ўдарыў яго. Супрацоўнікі міліцыі затрымалі пенсіянера. Бабруйскім гарадскім аддзелам Следчага камітэта ўзбуджаная крымінальная справа. Наўмыснае прычыненне цяжкага цялеснага пашкоджання караецца пазбаўленнем волі на тэрмін да васьмі гадоў.
